نەشتەرگەری دەرهێنانی گرێیەك بەسەركەوتوویی ئەنجام درا
" تەندروستی"
لە كارێكی پزیشكی سەركەوتوودا تیمە پزیشكییەكانی نەخۆشخانەی منداڵبوونی فێركاری سلێمانی توانییان لەڕێگەی نەشتەرگەرییەكی تایبەت و دەگمەن و وردەوە كۆتایی بە ئازاری خاتونێكی گەنج بهێنن كە بەدەست بوونی گرێیەكی گەورەوە لە منداڵدانیدا دەیناڵاند، بەمەش هیوای منداڵبوونیان بۆ گەڕاندەوە.
چیرۆكی نەخۆشەكە:
نەخۆشەكە خاتونێكی تەمەن 25 ساڵ بوو، كە بەدەست بوونی گرێیەكی ئێجگار گەورە لە منداڵدانیدا دەیناڵاند و ئەو گرێیە ببووە ڕێگرێكی سەرەكی لەبەردەم پڕۆسەی منداڵبوون.
بەهۆی مەترسییەكانی ئەم دۆخە و كاریگەرییە نەرێنییەكانی لەسەر توانای منداڵبوونی نەخۆشەكە، پزیشكان بڕیاریاندا بەپەلە پرۆسەی چارەسەركردن و نەشتەرگەریی بۆ دەستپێبكەن.
پرۆسەی نەشتەرگەرییەكە:
پرۆسە پزیشكییەكە لە نەخۆشخانەی منداڵبوونی سلێمانی و بە سەرپەرشتی بەشی نەشتەرگەری نەخۆشخانەكە و تیمێكی پزیشكانی پسپۆڕ كە پێكهاتبوون لە د.سۆما تاهیر و د.كانی فەرەیدون و پزیشكانی بێهۆشكاری و كارمەندانی تەندروستی بەشی نەشتەرگەری نەشتەرگەرییەكە ئەنجام درا.
لەم تەكنیكە پزیشكییە وردەدا، تیمەكە بە لێهاتووییەكی بەرزەوە توانییان گرێكە بە تەواوی لەناو منداڵدانی نەخۆشەكە دەریبهێنن، بەبێ ئەوەی هیچ جۆرە زیانێك بە شانە و پێكهاتەی منداڵدانەكە بگەیەنن.
سەركەوتنی پرۆسەكە و گەڕانەوەی هیوا بۆ نەخۆشەكە:
خۆشبەختانە نەشتەرگەرییەكە بە سەركەوتووییەكی بێوێنە كۆتایی هات و تەندروستی نەخۆشەكە جێگیرە و بەمەش دەرگایەكی نوێی هیوا و ژیانی ئاسایی بۆ ئەم خاتوونە گەنجە كرایەوە تا بتوانێت لە داهاتوودا ببێتە دایك.
ڕاگەیاندنی تەندروستی سلێمانی
ئهم بابهته 40
جار خوێنراوهتهوه
PM:01:34:06/07/2026